" She Writes..."

She Writes...
by ફરઝાના સિવાણી

 

18/06/16

Saturday.

 18:02

 એય તું ,

હા, તું !! હસમાં હો ..

અરે, હા બાબા, જાણું છું કે આજના જમાનામાં કોઇ પત્ર નો લખે , એ ય ને પ્રેમપત્ર.. પણ મને એમ થયું કે મારા ટેરવાંએ તરાસેલાં આ શબ્દો જો તારા ટેરવાંનો સ્પર્શ પામશે તો વરસાદ વરસશે લાગણીનો !! અને તું તો જાણે જ છે કે મને વરસાદ બહુ જ વ્હાલો છે , તારા જેટલો જ ... હ્મ્મ્મ્મ્ તારાથી થોડો ઓછો બસ !!!   

એક વાત કહું ?? આજકાલ આભમાં થોડાથોડા વાદળા દેખાઇ રહ્યાં છે અને મારું મન પણ પાણીથી છલોછલ વાદળું બનીને તને ભીંજવી નાખવાં , તરબતર કરી નાખવાં બેચેન થઇ જાય છે.. એમ થાય કે કાશ! હું એ વાદળોની જેમ ઊડી આવું તારી પાસે , હાહા , હૅરી પોટરની ફૅન ખરીને પાછી હું .. તું છે ને આ વાદળાઓને રાત્રે જો જે , જ્યારે તું અગાસીમાં સૂવા જાય ને ત્યારે , કોઇ એકાદમાં તને હું દેખાઇશ જેમ તું મને દેખાય જાય છે !! હું તો એ વાદળને એ દૂર દૂર જાય ત્યાં સુધી જોતી રહું અને એમાં જ મારી આંખ લાગી જાય, બોલ .. આવું તે હોતું હોય કદી ?? મારે તો તને જોવો હોય આખી રાત જાગીને ય પણ આ ઊંઘ બહુ લુચ્ચી નીકળે , હા ક્યારેક ક્યારેક ધરાર જાગું ને વાદળાઓમાં તને શોધ્યાં કરું !!

અરે, હા , ઊંઘ પરથી યાદ આવ્યું તને તો અગાસીમાં મસ્ત નીદર આવી જતી હશે ને ?? ઠંડો ઠંડો પવન ને ઉપર આખું ખુલ્લું આસમાન , જોડે મૉબાઇલમાં * FM *   નું કોઇ સ્ટેશન .. 

એય તું સુવે ત્યારે કેવો લાગે?? બંધ આંખો, ચહેરા પર શાંતિ , હાથ પગની એક ખાસ મુદ્રા, આખી કાએનાતથી બેખબર , બેફીકર .. એમ થાય કે એક આખી રાત મારે મારા ૨ પાંપણોની વચ્ચે ઉજાગરો આંજીને ય તને સુતો જોવો છે , જોયા કરવો છે !!! અને પછી તું પડખું ફેરવે ને ત્યારે હું જુઠ્ઠેજુઠ્ઠે મારી આંખો મીંચી દઇશ નહીંતર તું સાચેસાચું ખીજા પાછો , હુહ !!


અરે , આ જો , તને પ્રેમપત્ર લખવાંમાં ખીચડી દાઝી ગઇ .. ચલ , હવે હું ભાગું હો ને .. સરખું ખાજે અને બાહરના કચરાં નો ખાતો પાછો ...

આવી હમણાં..

તારી વ્હાલી ,
With Love,
From Me .




18/06/16.
" With Love,From Me." 
By ફરઝાના સિવાણી 
farzanasivaniblog@gmail.com

Share this

Unknown